Praha na hinaše wašnje

wutora, 9.oktobra

Naš prěni dźeń w Praze započa so z čitanjom w filozofiskej fakulće Karloveje uniwerzity wo filozofiji. We wulkej čitanskej žurli sćěhowachmy 90min čěskemu přednoškej. Po tym podachmy so na Vyšehrad, hdźež wobhladachmy sej rowy znatych čěskich wosobinow, kaž Bedřicha Smetany. W cyrkwi Swjateju Pětra a Pawoła dachmy so wot starodawneho monumentneho twara fascinować. Po krótkim swobodnym času a słódnym wobjedźe zetkachmy so ze susodom knjeni Štilleroveje. 17lětny Honza přeprosy nas do rjaneje kofejownje a my z nim tróšku čěsce pobachtachmy. Zesylnjeni podachmy so na nahły puć na Strahovský klášter, kotryž je zdaloka hižo na směr Hradčany widźeć. Tam maja nimo wulkej a starej biblioteki tež swójsku piwarnju. Z tramwajku jědźechmy přez zatykane dróhi Prahi k wječeri a po tym podachmy so hišće do kina na nowy čěski film „Toman“, kotryž w nas hłuboki zaćišć zawostaji. Tak smy na prěnim dnju w Praze smy hižo tójšto noweho nazhonili a dožiwili.                                                                                  Weronika Šnajdrec

srjeda, 10.oktobra

Srjedu, dnja 10.10. a z tym na našim třećim dnju w Praze wopytachmy k druhemu razej čitanje na Karlowej uniwerziće. Potom podachmy so na puć do druheho dźěla města, kotryž rěka “Žižkov”, zo pychmy sej mawsolej na horje Vitkov wobhladali. Jako stejachmy na třěše mawsolea, kotryž je patriotiski monument k ćesći Jana Žižka, mějachmy krasny wuhlad na cyłe město. Po čěskim wobjedźe w korčmje blisko mawsoleja podachmy so zaso do centra Prahi. Tam wobdźiłachmy jedyn z nacionalnych symbolow Prahi, mjenujcy nacionalne dźiwadło. Přez čěske wjedźenje zhonichmy wjac wo stawizny a twarskim stilom dźiwadła.                                                                       Cecilija Neterec

štwórtk a pjatk, 11. a 12. oktobra

Na štwórtku wopytachmy w Karlowej uniwerziće přednošk morfologije. Po tym běžachmy na něhdyši pomnik Stalina. Tutón bu wot komunistow postajeny, ale w 60tych lětach jón zaso wotstronichu a dźensa steji tam metronom, kotryž pokazuje, kak běži čas. Zady toho je wulki park za wočerstwjenje z jara rjanym widom na Prahu. Tež na tutym dnju mějachmy zaso wulke zbožo z wjedrom. Słónco swěčeše cyły dźeń a žadna mróčelka njeběše widźeć. Po dołhej přestawce, w kotrejž móžachmy sebi Prahu hišće raz samostatnje wobhladać, wupožčichmy sebi čołmik k padlowanju. Z tutym jědźechmy potom wšitcy hromadźe hodźinu po Vltawje.Wobkedźbowachmy kak so słónco pomału wza horicontom chowa a Praha so přitym do znateho ,,Prague by night” přeměnješe. Wječor dachmy potom ze słódnej wječeru a wopyće na Praskim hrodźe wuklinčeć. Po napinacym poslednim dnju z tójšto běhanjom, slědowaše pjatk jězba wróćo do Łužicy. Přez někotre wokopuće wróćichmy so hišće do popołdnja do Budyšina.                                          Fabian Hejduška a Franc Matješk