W ramiku wučby cuzych rěčow přewjedźachu so za šulerjow 6. lětnika      wot 25.- 27. junija 2019 projekt, zo bychu so w krajopisu w předmjetach čěšćina, rušćina a francošćinu wukmanili.

W čěšćinje planujechmy mjez druhim ekskursiju do coologiskeje zahrody w Liberecach, pječenje čěskich palačinkow, spěwanje a dźiwadźelenje a zeznaće zajimawostkow z Čěskeje.

Dokładny program:

wutora, 25.6.2019

1. do 6. hodźina – krajopis Čěskeje, spěwanje, přihot dźiwadła

srjeda, 26.6.2019

ekskursija do coologiskeje zahrody do Liberec                            

štwórtk, 27.6.2019

čěska kuchnja: pječenje čěskich plincow, wuhódnoćenje projekta, předstajenje kónčnych wuslědkow ruskeje a francoskeje skupiny

Ekskursija do Liberec 26.6.2019

Rano w sedmich zetkachu so šulerjo čěšćiny 26.6.2019  na dwórnišću w Budyšinje. W 7.11 hodź. podachu so z ćahom do zwěrjenca do Liberec. Jako běchu do zwěrjenca dóšli, dóstachu wšitcy nadawk: Z pomocu karty dyrbjachu zwěrjata pomjenować. Přińdźechu pola girafow, elefantow, běłych tigrow, pinguinow a tójšto dalšich zwěrjatow nimo. Zwěrjenc w Liberecach je jara wulki, z mnoho hrajkanišćemi a budkami z čěskimi specialitami, kotrež su tež naši šulerjo wuspytali. Dyrbjachu so najprjedy na cuze pjenjezy zwučić, ale potom je so wšitko derje poradźiło. W kupnicy su sej někotři hišće čěske produkty kaž kofolu a po tym podachmy z ćahom so wróćo do Budyšina. 

J. Štillerová

Po wulkotnym koncerće “Podlěćo” w Budyskej Michałskej cyrkwi podachmy so njedźelu wječor na puć do Litawskeje stolicy, do Vilniusa. Wokoło připołdnja, po měrnej nócnej jězbje, zetkachmy so w měsće z našej brigadnicu Jadwigu, kotraž přebywaše cyłe šulske lěto w hóstnej swójbje w Litawskej. Wona wjedźeše nas přez centrum města, zo bychmy Vilnius zeznali. Na to měješe kóždy čas za indiwidualnu wječer a wotpočink.

Wutoru podachmy so po snědani pěši k ortodoksnej cyrkwi, w kotrejž mějachmy krótke wjedźenje. Našu připołdnišu probu přewjedźechmy při najrjeńšim wjedrje na małej łuce pódla našeho hostela. Popołdniše serbske kemše w swětoznatej kapałce Miłosćiweje madony z knjezom fararjom dr. Fischerom hudźbnje wobrubichmy. Po kemšach podachmy so hišće do Vilniuskej synagogi. Při wjedźenju zhonichmy zajimawostki wo židowskej kulturje a stawiznach. Před synagogu zaspěchmy židowsku modlitwu Hine ma tov. Wječor kóždy na swoje wašnje dožiwi.

Cyłu srjedu wopytachmy šulu města Marijampole, na kotrejž Jadwiga poslednje šulske lěto chodźeše, 150 km zdalene wot Vilniusa. W tutej šuli spěwachmy mały koncert a předstajichmy naš lud a našu kulturu. Ze zhromadnej reju poradźi so nam kulturelna wuměna ze šulerjemi a wučerjemi. Na to dóstachmy wot gymnazijastow wjedźenje přez město Marijampole, kiž je bohate na modernych wobrazach při domskich fasadach. Po dołhej wróćojězbje mějachmy wječor swobodny čas.

Štwórtk rano po snědani podachmy so do Trakai. Wobhladachmy sebi tam swětoznaty wódny hród. Při wjedźenju bu na někotrych městnach masow turistow dla chětro wuske a wótře. Z nowej wědu a prózdnymi brjuchami podachmy so w měsće Trakai do tradicionalneho litawskeho hosćenca, hdźež dóstachmy dobru typisku litawsku jědź z wowčim mjasom we wosebitym ćěsće. Po wróćojězbje do stolicy zasta bus srjedź města. W cyrkwi swjateju Pětra a Pawoła swjećachmy nawječor serbske kemše z knjezom fararjom dr. Fischerom. Procesion na Božim ćěle wotměješe so wjedra dla w cyrkwi.  Po tym poda so cyła Brigada hudźo a spěwajo na wulke torhošćo před katedralu. Tam spěwachmy z Litawčenjemi a turistami serbske spěwy a rejowachmy hač do pózndeho wječora serbske reje. Před nócnym měrom mějachmy hišće swobodny čas, kotryž 12tki z knjezom Böhmu wuklinčeć dachu.

Na poslednim dnju wopytachmy dopołdnja MO-muzej, w kotrymž běchu moderne a towaršnokritiske eksponaty wustajene. Wodźachu nas z pomocu našich smartphonow přez muzej. Po tym wobjedowachmy we wuměłskej akademiji Vilniusa. Mějachmy hišće swobodny čas, zo bychmy sej hišće něšto k wječeri a za jězbu wobstarali. Wječor podachmy so z busom zaso na 15-hodźinsku jězbu. Z nowymi a rjanymi nazhonjenjemi wróćichmy so wšitcy do domizny.

 Jan Clausen

We wobłuku dworoweho swjedźenja woswjećichmy tradicionelne mejemjetanje, kotrež přewjedźechu pjaty a dwanaty lětnik kaž tež šulerjo zakładneje šule. Naša brigada zahaji swjedźeń pod nawodom Theje Čórlichec z wónčkom spěwow. Lětsa přewodźeše nas k rejam prěni króć orchester – tak nasta swjatočna a wjesoła atmosfera. Ale tež akordeonistaj přenjeseštaj swoje wjeselo při spěwje na šulerjow a hosći. Znamjo zwjazanosće woběju pjateju rjadownjow bě, zo sej nowy mejski kral swoju kralownu z paralelki wuzwoli.

Dźak wšitkim, kiž su k zwoprawdźenju tutoho rjaneho dopołdnja přinošowali. 

Pjatk, dnja 31. meje 2019, poby instrumentalna skupina brigady w partnerskim měsće krajnoradneho zarjada Budyšin, w Bolesławiecu. Pod hesłom „Hranicy překročace kultury- zhromadnje zamjezne identity wotkryć“ wotmě so mjeztym hižo štwórty raz festiwal, na kotrymž wobdźělichu so lětsa prěni króć tež serbskej kulturnej skupinje: Matti Dils, Pawlina Liznarjec, Cecilija Šwajcerec, Franc Stübner a Maximilian Gruber wuhotowachu zhromadnje z Brětnjanskej dźěćacej rejwanskej skupinu pisany program, za kotryž žnejachu wutrobny přiklesk. Festiwal spěchuje so ze srědkami europskeho fondsa za regionalne wuwiće euroregiona Nysa. 

Šef mafije snadź zakonje hišće cyle zrozumił njeje... Podobnje pak dźe so tež hdys a hdys młodym šulerjam. Samo po přesadźenju do druheje šule ze swojich zmylkow njewuknu a podaja so znowa do strašneje situacije. W dźiwadle “Wulki són wo mnoho pjenjezach” spyta šulerka, po lěto trajeceho přesadźenja na druhu šulu,  z jeje bandu znowa banku wurubić. Hač so jim to zešlachći?

To móžeće sej štwórtk, dnja 23.05.2019, w 18:30 hodź. w awli Serbskeho gymnazija w Budyšinje wobhladać. Šulerjo 10. lětnika su 40- mjenšinski program k temje “Pjenjezy” z hudźbu, reju a dźiwadłom zestajili. Wšitcy zajimcy su wutrobnje witani, zastup je darmotny. Wot 18:00 hodź. su durje za Was wotewrjene.

Wjeselimy so na Waš wopyt.

Šulerjo 10. lětnika

Nowe lěto – nowe wužadanje. Wutoru, 07. meje 2019 běše znowa tak daloko. Šulerjo Serbskeho gymnazija Budyšin wobdźělichu so znowa na kóždolětnym mjezynarodnym wubědźowanju w jendźelskej rěči. Z cyłkownje 102 přizjewjenych šulerjow a šulerkow je 98 wobdźělnikow z 5. do 9. lětnika na prašenja wšelakich niwowowych schodźenkow w formje multiple choice  wotmołwiło. Napjatosć bě kaž přeco wulka a wot 14.meje 2019 móža sej z pomocu modernych medijow samostatnje wuslědki online wotwołać.

Za pjaty lětnik bě wobdźělenje wězo nowostka a  “wulke wužadanje”. Informacije k wubědźowanju namakaće pod www.thebigchallenge.com/de .

Na kóncu šulskeho lěta dóstanje kóždy wobdźělnik jedyn certifikat a wotpowědnje wuslědkam mjeńše abo tež wjetše myto.