naslědnosć zahibnyć – Serbski gymnazij Budyšin stanje so z modelowej šulu za naslědne zežiwjenje
Zhromadny projekt z přetrjebarskej centralu Sakskeje
Strowoće tyjaca a na dobro klimy wusměrjena jěsć w šuli, to słodźi a je naslědne: Na tym chcemy w šulskim lěće 2022/23 zhromadnje z přetrjebarskej centralu Sakskeje dźěłać a ideje za wšědny dźeń wuwiwać. Wosebje za 8. lětniki budźe lěto cyle w znamjenju naslědneho konsuma stać. We wšelakich dźěłarničkach, na projektowych dnjach a we šulskej wučbje budźemy w tutym šulskim lěće z fachowcami přetrjebarskeje centrale ideje wuwiwać – za wašnje zežiwjenja, kotrež tyje strowoće a wobswětej.
Zaběramy so ze zežiwjenjom w globalizowanym swěće, přetož jědźe k hnydomnemu wužiwanju abo derje zapakowane žiwidła njepřeradźa na prěni pohlad ničo wo komplikowanym puću z hródźe abo pola, přez industrijne předźěłanje a wikowanje hač do domjaceje kuchnje. Kak hodźi so tu naslědne žiwjenske wašnje sobu tworić? Zežiwjenje ma w prěnim rjedźe strowoće tyć? Čehodla jěmy scyła to, štož jěmy? A štó nas při tym wobwliwuje? A po jědźi? Kóždy kilogram preč ćisnjenych žiwidłow wobćežuje wobswět a klimu, přetož zhotowjenje žiwidłow přetrjeba energiju kaž tež płoniny, kotrež njemóže přiroda w tym wokomiku na druhe wašnje wužiwać. Kak móžemy potajkim tomu zadźěwać, zo so zbytki žiwidłow preč njemjetaja?
Tutym napjatym prašenjam chcemy so zhromadnje wěnować a so we wšelakich formatach we wučbje a zwonka njeje tematice zbližić.
Zazběh za projekt je w septembru. Wostanjemy z wami nastupajo akciju w zwisku.
