Serbski gymnazij Budyšin

Informacija šulskeho wjednistwa

Na zakładźe podkročenja inzidency wot mjenje hač 35 we wokrjesu Budyšin płaća wot póndźele 14.06. sćěhowace změny.

 

  • W šulskim domje a na šulskej ležownosći njedyrbi so nahubnik wot wučerjow a šulerjow nosyć.
  • Šuli njepřisłušne wosoby dyrbja dale nahubnik w šuli a na šulskej ležownosći nosyć.
  • Dwójne testownje so dale na póndźeli a srjedźe přewjedźe.

Wot 14.06. so zaso cyłodnjowske poskitki wotpowědnje znatym časam poskića.

To su:

- inlinehockey

- wolejbul a lochkoatletika

- orchester

- brigada wot 23.06.

- domjace nadawki

 

 

Z přećelnym postrowom

R. Wjacławk

šulski nawoda

 

Wučba za wšitkich šulerjow zhromadnje móžna

Podkročenje inzidency wot  50

 

Na zakładźe spadowaceje inzidency a podkročenja hódnoty wot 50 we wokrjesu Budyšin, přeńdźe so zaso k prawidłownej wučbje  pod wuměnjenjemi pandemije. Tuto ma za wokrjes Budyšin wot 09.06. 2021 płaćiwosć.

Winowatosć k dwójnemu testowanju w běhu jedneho tydźenja wobsteji za šulerjow dale. Tohorunja maja so wšitke dotalne naprawy k škitej před infekcijemi dodźeržeć. 

 

R. Wjacławk

šulski nawoda

Informacije k organizaciji wučby wot 26.04.

Staršiska informaciija

Česćene starši,

chcemy Was wo zasadnych organizatoriskich rjadowanjach a wo dalšim pokročowanju wuwučowanja za čas wot 26.04. 2021 informować. 

Na zakładźe wobzamknjenja parlamenta Zwjazkoweje republiki Němskeje, wostanu we wokrjesu Budyšin šule tak dołho zawrjene, doniž so incidenca  na pjeć naslědnych dnjach pod 165 njezniži. Ručež so tute wuwiće pokaza, smědźa so šule zaso wotewrić. K tomu informujemy Was sčasom.

 To woznamjenja, zo maja wot 26.04. 2021 wšitcy šulerjo SEK I znowa wuknjenski čas wot doma.

 Za jednotliwe lětniki płaći sćěhowace:

 12. lětnik

  • Pisomne a ertne pruwowanja so po znatych terminach přewjedu.
  • Wšitke powučenja k maturitnym pruwowanjam maja płaćiwosć. Winowatosć k testowanju wobsteji dale.

11. lětnik

  • Šulerjo 11. lětnika so dale w změnach (skupina A/ skupina B) w šuli wuwučuja.
  • Wšitke hygieniske předpisy po aktualnym hygieniskim planje a winowatosć k testowanju wobsteja dale. Spěšnotesty přewjedźemy w šuli stajnje póndźelu w třěćej a srjedu w prěnjej hodźinje.

5. do 10. lětnik

  • Wotpowědnje hodźinskemu planej so za čas domjaceje wučby nadawki přez fachoweho wučerja na LernSax staja.
  • Onlinewučba móže so přewjesć. Wona so w času regularneje wučby poskići:
    • maksimalnje 45 mjeńšinow na jednu konferencu
    • maksimalnje tři konferency wob dźeń
    • onlinewučba a přidatne nadawki dyrbja so tydźeńskemu wobłukej hodźinow předmjeta přiměrić.
  • Hižo připowědźene hódnoćenja a wukonowe kontrole smědźa so k stajenym terminam přewjesć. Znamkowanje přewjedźe so na zakładźe wobzamknjenja fachoweje skupiny.
  • Zasadnje smědźa so wšitke wukony po připowědźenju znamkować.
  • Wšitke terminy (wukonowe kontrole, onlinewučba, nadawki k wotedaću) zapisaja so do digitalneho kalendra rjadownje na LernSax.
  • Wočakujemy dospołne wobdźěłanje stajenych nadawkow.
  • Prošu informujće w padźe chorosće rjadowniskeho wučerja a sekretariat šule.

 

Nam je wědomje, zo staja so znowa wulke wužadanja na wšitkich. My přejemy Wam a Wašim dźěćom za čas domjaceje wučby wutrajnosć, sćerpnosć a wosebje wjele mocow. Prošu nawjazajće při ćežach znami kontakt.

 

Z přećelnym postrowom

R. Wjacławk

šulski nawoda