šulske wjednistwo
Featured
Featured
Informacija wo dnju wotewrjenych duri na SGB, wutoru 18.11.25
Česćeni starši, lubi zajimcy,
pod motom: Šulu widźeć – so zahorić a sobu činić chcemy tež lětsa zaso naše durje 18. nazymnika 2025 na Friedrich-Listowej 8 šěroko wotewrěć.
Wot 16.00 do 18.00 hodź. poskićimy pisany a wotměnjawy program na našim Dnju wotewrjenych duri.
Program wopřija hudźenje a spěwanje při zjawnych probach małeho chóra a orchestra. Tež předmjety serbšćina, jendźelšćina a druhe cuze rěče so předstaja. Dale móžeće so tež wo dźěle šulerskeje rady na našej šuli informować a dožiwiće cyłodnjowske poskitki. W přirodowědach budu so zajimawe eksperimenty předstajić kaž tež wšelakore zjawy přirody rozjasnić. Šulerjo ze zakładneje šule a přidružnicy z wyšich šulow móža składnosć wužić a so z nowačkami zašłych lět rozmołwjeć.
Mnozy šulerjo su so za wuhotowanje předmjetow a dalšu pomoc na najwšelakorišich městnach přizjewili. Hladajo na to prosymy Was, zo byšće dompuć Wašeho dźěsća a snano tež sobušulerja zaručili.
Dokładniše informacije dóstanu šulerjo wot zamołwiteho fachoweho wučerja.
Dźakujemy so Wam za pomoc a wjeselimy so na dožiwjenjapołne popołdnjo.
Přećelnje strowi
kolegij wučerjow Serbskeho gymnazija Budyšin
Featured
Póndźelu, 15.09.2025, wotmě so w cyrkwi swj. Marije a Marty w Budyšinje hnujacy koncert k 80. róčnicy kónca Druheje swětoweje wójny. Ze swojim programom „Zo dobra Němska kćěje“ prezentowaše dujerski kwintet Opus 45 zhromadnje ze w Budyšinje rodźenym dźiwadźelnikom Romanom Knižku hnujacu hudźbnu hommage na stawizny, kotraž směła mnohim připosłucharjam hišće dołho w pomjatku wostać.
W srjedźišću zhromadneho projekta třoch Budyskich gymnazijow - Friedricha-Schilleroweho gymnazija Budyšin, Philippa Melanchthonoweho gymnazija Budyšin a Serbskeho gymnazija Budyšin, rěkaše hesło „Dopominanje, napominanje a nadźija“. Před 650 šulerkami a šulerjemi pokaza Opus 45 skutkownje, kak móže hudźba dopomnjenki wobchować a runočasnje mosty mjez zašłosću a přitomnosću twarić. Ćežišćo koncerta ležeše na kóncu wójny w Budyšinje, kotrež bu w tekstach naležnje tematizowane. Roman Knižka čitaše z wulkej intensitu z dźenikow, listow a rozprawow časowych swědkow wo poslednich wójnskich dnjach w swojim ródnym měsće Budyšinje, přez čož dósta program přidatnu emocionalnu a rozswětlersku dimensiju.
Swědomiće zestajany program wjedźeše připosłucharjow na hudźbnym pućowanju wot hrózbow wójny hač k pohladej połnemu nadźije do přichoda. Nimo klasiskich twórbow z časa Druheje swětoweje wójny zaklinčachu tež šlagry a swingowe melodije pózdnich 1940tych lět, kotrež připosłucharkam a připosłucharjam atmosferu bjezposrědnjeho powójnskeho časa skutkownje před wočomaj wjedźechu a wokomiki lochkosće a nadźije zahajichu.
Koncert njebě z tym jenož hudźbny highlight, ale zdobom napominanje, kak wažne je, stawizny na přiměrjene wašnje reflektować a kulturne herbstwo aktiwnje pěstować. Opus 45 zrozumi mištersce, připosłucharjam ćežu spominanja kaž tež móžnosć nowozapočatka po wójnje do hudźby přełožić. Z programom „Zo njech dobra Němska kćěje“ je ansambl w Budyšinje rum za dopomnjeće, dialog a nadźiju stworił. Dźakowno kombinaciji naročneje hudźby a historiskeje literatury sta so koncert z kulturnym podawkom, při kotrymž hudźba kaž tež jeje bjezčasna móc skutkownje w srjedźišću steješe.
Zwoprawdźenje projekta bě wuslědk prócy šulskich nawodnistwow mjenowanych kubłanišćow sprjewinjeho města. Towarstwo Pro Colore z.t. je předewzaće podpěrało.
R. Wjacławk
Čěšćina skupina 7. Lětnika Serbskeho Gymnazija podaše so wot 05.06 do 06.06.25 na ekskursiju do Prahi. Štwórtk napoł wosmich zetkachu so 28 šulerjo při Budyskim dwórnišću. Knjeni Štillerová, wučerka čěšćinje, a knjeni Delanowa, maćerka subušulerki, přewodźachu jězbu. Po tym, zo su młodostni z Budyšina wotjězdźeli dyrbjachu přelěsć do ćaha, kotrjež přinjese jich do Žitawy. Tam pokročowaše jězba z narunanskim busowym wobchadom. W Liberjecach mejachu čěsćinarjo přestawku a sebi eura do kronow přemenjachu. Zte dalšim busom dojědźechu potom w Praze a tam wotmějše so druha přestawka na Waclawskim naměsće. Tu započeše jich měsćanske wobhladanje. Woni chcychu po Kralowskim puću bežeć. Puć wjedźeše wot Prašnej branje přez ´Staroměstské náměstí´,´Karlův most´ a ´Malostranské náměstí´na ´Hradčany´. Na kóždeje stacije dźeržachu šulerjo w skupinkach přednoški wo čěskich atrakcijach. Při Karlowym mostu dźělachu sebi někotři přećeljo ´trdelník´(něm.: Baumstriezel). Knjeni Štillerová činješe ze fotografowanjom waponow małke wubědźowanje. Štó najwjace woponow ma, dobudźe małku překwapjenku. Na Hradčanje mejachu krasny wuhlad a wopytachu tež ´Zlatou uličku´. Wječerjachu w tradicialnym hosćeńcu, kiž mjenuje so ´Česká koruna´. W młodarnje mějachu swobodny čas a rano sonzaso zetkawachu, zo běchu z metru k pjekarnje, hdźež chcychu snědać, přišli. Dyrdomdej pokročowaše na horje Petřin. Pučowachu runu smuhu k petřinskej rozhledenej. Wot wěže móžachu přez cyłe město hladać a sćěhować, kak su dźeń do toho beželi. Wopytachu tam tež hišće špihelowy lybyrint. Wróčojězba běše samsna kaž přijězd. Jenož, zo połojca šulerjow rjadownju hižo w Biskopicach wopušćichu a zbytk potom ze přepjelnenym ćahom do Budyšina jězdźeše. Hakle w 16:19 hodź. dojědźechu na dwórnišću. Tu zakončeše so ekskursija do Prahi za wšitkich.
Milena Wockec, Mila Klimanec, 7-1
