Wot 13. do 16. nowembra 2024 wotmě so we Werdauwje Centralny rěčny seminar, na kotrymž wobdźělichu so najlěpši šulerjo cyłeje Sakskeje. Lětsa bě pjeć rěčow zastupjenych: čěšćina, rušćina, łaćonšćina, španišćina a francošćina. Z našeje šule buchu za čěšćinu slědowace šulerjo wuzwoleni: Luisa Hančikec a Marta Handrikec (wobě 10. lětnik) a Filip Malink (9. lětnik).

Tema seminara rěkaše tónraz „Zapping through the TV-channels“. Šulerjo mějachu nadawk, pisany a zajimawy přinošk k tutej temje přihotować. Nazhonita dźiwadłowa pedagogowka podpěrowaše wobdźělnikow při tym, zakłady předstajenja nawuknyć a jich kreatiwne ideje zwoprawdźić. Pjatk wotmě so potom z napjatosću wočakowana premjera přinoškow, kotrež publikum zahori.

Nimo kreatiwnych dźěłarničkow mějachu šulerjo tež składnosć, so přez mnohe hry a aktiwity z druhimi rěčemi lěpje zeznajomić. W swobodnym času hrajachu wjele blidotenisa a wolejbul abo móžachu so w fitnes-studiju wucychnować. Tež wo ćělne derjeměće běše postarane: Jědź za bě słódna a zaručeše, zo móžachu wšitcy połni energije do dźěłarničkow a aktiwitow startować.

Centralny rěčny seminar njeskićeše jenož wuběrnu platformu k spěchowanju rěčnych kmanosćow, ale tež móžnosć, nowe přećelstwa nawjazać a njezapomnite dožiwjenja hromadźić.

PhDr. Jana Štillerová

Pjatk, 15. nowembra 2024, bu “Wučbna šćežka wo žiwjenju Serbow we Warnoćicach po 1945” swjatočnje wotewrjena. Organizowany bu tutón wuznamny projekt wot dr. Jany Piňosoveje a dr. Roberta Lorenca ze Serbskeho instituta w Budyšinje. Na zwoprawdźenju su šulerjo kursa čěšćiny 12. lětnika Serbskeho gymnazija w Budyšinje zhromadnje ze šulerjemi gymnazija we Warnoćicach dźěłali.

We wobłuku projekta, kotryž traješe połdra lěta, přewjedźechu šulerjo mjez druhim dwudnjowskej dźěłarničce w Budyšinje a Warnoćicach. We wučbnych hodźinach wuwichu logo, pytachu za časowymi swědkami a přewjedźechu interviewy z nimi. Wažny wobstatk projekta bě tež kulturna wuměna: Mały chór, rejwanska skupina a hrajerka dudow Serbskeho gymnazija přihotowachu koncert w awli gymnazija we Warnoćicach. Nimo toho buchu teksty a informacije za informaciske tafle přihotowane a nahrawanja we wšěch třoch rěčach zestajane.

Zahajensku swjatočnosć zahaji so 15.11.2024 w 15 hodź. před šulskim twarjenjom we Warnoćicach ze zawodom přez dr. Janu Piňosovu, dr. Roberta Lorenca a M. Hrabala. W 15:30 hodź. prezentowachu so historiske dokumenty ze serbskeho žiwjenja we Warnoćicach kaž tež fota z projekta „Wučbna šćežka“. W 16 hodź. přewzachu šulerjo wobeju šulow moderaciju zarjadowanja – z našeje šule moderěrowaše Sofija Hančikec z 12. lětnika. Hudźbnje wobrubjeny bu swjedźeń wot hudźbneje šule z Warnoćic.

Postrowne słowa porěčachu mjez druhim Jan Šimek, měšćanosta Warnoćic, František Paulus, zastupowacy direktor tamnišeho gymnazija, René Wjacławk, šulski nawoda Serbskeho gymnazija Budyšin kaž tež Rejza šěnowa, něhdyša šulska nawodnica SGB. Jakob Venoss, zastupjer Němsko-čěskeho fondsa přichoda, kotryž cyły projekt financielnje podpěrowaše a Dawid Statnik, předsyda Domowiny, měještaj tohorunja krótku swjedźensku narěč.

Wosebje hnujacy bě wustup třoch časowych swědkow – něhdyšich serbskich šulerjow we Warnoćicach – kotřiž rozprawjachu wo swojich nazhonjenjach a dopomnjenkach na tehdyši šulski čas. Zarjadowanje zakónči so z dźaknymi słowami wšěm wobdźělenym a małym bifejom.

Po połdra lěće intensiwneho dźěła na tutej temje bu projekt wuspěšnje zakónčeny a informaciske tafle we Warnoćicach postajene. Wučbna šćežka njebudźe jenož wědu wo serbskej kulturje a stawiznach spěchować, ale tež interkulturelnu wuměnu mjez šulerjemi a zhromadnosću zesylnić. Dźakujemy so wšitkim wobdźělenym za jich angažement a podpěru!

PhDr. Jana Štillerová

Wot 1. do 2. oktobra 2024 přewjedźechu šulerjo čěšćiny 8. lětnika napjatu ekskursiju do Prahi. Jězba zahaji so z ćahowej jězbu z Budyšina do Libereca, sćěhowana wot komfortabelneje busoweje jězby z Regiojetom z Libereca do Prahi. Šulerjo běchu połni předwjesela na wuslědźenje čěskeje stolicy.

Do Prahi dojěwši, wužichu šulerjo podzemsku železnicu a tramwajku, zo bychu so w měsće dale pohibowali. Jeje přebytk bě hostel Franz Kafka, kiž bě w starym měsće, cyle blisko sławneho Staroměšćanskeho koła w židowskej štwórći. Tute centralne połoženje zmóžni šulerjam, město přijomnje wotkryć.

Wažny wobstatk ekskursije bě prezentacija, kotruž běchu šulerjo we wučbje přihotowali. Kóždy šuler bě zajimawostku na kralowskim puću wuzwolił a tutu w přednošku předstajił. Tute prezentacije buchu filmowane, zo bychu film wo Praze zestajeli, kotryž dokumentuje dožiwjenja a wědu šulerjow.

Kulinariske dožiwjenja tohorunja překrótko njepřińdźechu. K wječeri wopytachu šulerjo hosćenc Korona, hdźež mějachu móžnosć, swoje jědźe sami skazać. Nazajtra zesylnichu so w pjekarni Antonínovo, hdźež tohorunja swoje skazanki snědanje sami spušćichu. Tute nazhonjenja njespěchowachu jenož samostatnosć šulerjow, ale pruwowachu tež znajomosće čěšćiny.


Druhi dźeń steješe wopyt Petřínoweje wěže na programje. Bohužel powjaznica dla hladanskich dźěłow zwonka dźěławosće njebě, tak zo dyrbjachu šulerjo cyłu horu pěši krosnować. Petřínowa wěža, kotraž je napodobnjena z Eiffelowej wěžu w Parisu, skićeše dych wotražacy wuhlad na Prahu. Bohužel bě dźeń wot kurjawy charakterizowany, štož wid trochu wobmjezowaše, přiwšěm běchu šulerjo zahorjeni wo wuhledźe a napinanju, kotrež běchu na so wzali.

Posledni programowy dypk bě wopyt špiheloweho labyrinta. Špihele reflektowachu wopytowarjow ze wšelakich perspektiwow, štož wjedźeše k lóštnym a překwapjacym wokomikam. Šulerjo móžachu so sami we wšelakich wulkosćach a formach widźeć, štož wjedźeše husto k smjeću a zadźiwanju.

Ekskursija skónči so z wróćojězbu do Budyšina, zaso z busom a ćahom.

Cyłkownje bě ekskursija do Prahi połny wuspěch. Šulerjo njemóžachu jenož wjele wo stawiznach a kulturje města wuknyć, ale tež swoje teamowe dźěło a prezentaciske kmanosće dopokazać. Dopomnjenki na tutu jězbu zawěsće hišće dołho we hłowach šulerjow wostanu.



PhDr. Jana Štillerová