W ramiku wučby cuzych rěčow přewjedźechu so za šulerjow 6. lětnika wot 26. do 28. apryla 2022 projekty, zo bychu so w předmjetach čěšćina, rušćina a francošćinu w krajopisu wukmanili.

Čěšćina

W čěšćinje planowachmy mjez druhim ekskursiju do coologiskeje zahrody w Liberecach, pječenje čěskich palačinkow, spěwanje a rejowanje a zeznaće zajimawostkow Čěskeje.

Dokładny program

wutora, 26.04.2022

1. do 6. hodźina – krajopis Čěskeje, čěska kuchnja: pječenje čěskich plincow

srjeda, 27.04.2022

ekskursija do coologiskeje zahrody do Liberec a wopyt centruma

štwórtk, 28.04.2022

krajopis Čěskeje, spěwanje a rejowanje, wuhódnoćenje projekta, předstajenje kónčnych wuslědkow

Ekskursija do Liberec 27.4.22

Rano w 7.30 zetkachu so šulerjo čěšćiny na dwórnišću w Budyšinje. W 7.37 hodź. podachu so z ćahom do zwěrjenca do Liberec. Jako běchu do zwěrjenca dóšli, dóstachu wšitcy nadawk: Z pomocu karty dyrbjachu zwěrjata pomjenować. Přińdźechu pola girafow, elefantow, běłych tigrow, pinguinow a tójšto dalšich zwěrjatow nimo. Zwěrjenc w Liberecach je jara wulki, z mnoho hrajkanišćemi a kioskami z čěskimi specialitami, kotrež su tež naši šulerjo wuspytali. Hólcy a holcy dyrbjachu so najprjedy na cuze pjenjezy zwučić, ale potom je so wšitko derje poradźiło. Nimo coologiskeje zahrody wobhladachmy sej tež naměsto a rjanu wulku radnicu w centrumje. W kupnicy su sej někotři hišće čěske produkty kaž Kofolu kupili, a po tym podachmy so z ćahom zaso wróćo do Budyšina.

J. Štillerová

Francóšćina

So do druheje cuzeje rěče zanurić, to bě projekt 6. lětnika Serbskeho gymnazija. Tři dny dołho zaběrachu so šulerki a šulerjo 6. lětnika Serbskeho gymnazija mjez druhim z francošćinu.

Wuknjace Francozowki a Francozojo wotkrywachu spočatnje powšitkownu topografiju susodneho kraja. Po tym, zo běchu tež zwěrjata pomjenowali, sćěhowachu woni hladajo a słuchajo dyrdomdejej małeho francoskeho rjeka we filmje Pierre Lapin.

Přichodny dźeń zaznawachu kraj z dalšimi zmysłami. Spočatk tworješe typiska francoska snědań z Croissants. Dalše jědźe a wašnja při blidźe nadźěłachu sej wuknjacy z pomocu online-wustupow někotrych hosćencow w Parisu. Słódne Quiches, kotrež běchu šulerjo a šulerki k wobjedu spřihotowali, wšitkim zesłodźachu.

Nowu wědu prezentowachu woni na zakónčacym dnju swojim sobušulerjam. Za to běchu swójski francoski menu nastajili a samo wopyt restawranta předhrali. Bravo!

A.Weitzmannowa, Z. Rjedźina

Rušćina

We wobłuku projektoweho tydźenja dóstachu šulerki a šulerjo 6. lětnika wjele krajowědnych informacijow wo Ruskej. Mějachu tež móžnosć, tradicionalnu rusku kuchnju zeznać. Holcy a hólcy woptachu tradicionalnu rusku snědań a zwarichu zhromadnje Olivier – tradicionalnu nowolětnu solotej. Nimo toho wotkrychu sej zajimawostki wo Ruskej a zhonichu tójšto noweho wo jónkrótnej přirodźe a wobdźiwajomnej klimje kaž tež wo znatych městach a zajimawostkach hoberskeho kraja. Ruske bajki a filmy su so šulerjam wosebje lubili.

Anastasia Artemova

My čěšćinarjo 9. lětnika podachmy so 13. 06. 2022 do čěskeje stolicy. Rano zetkachmy so wšitcy při Budyskim dwórnišću. Po dwěmaj hodźinomaj jězby dojědźechmy do Liberec. Tam mějachmy čas, sej wulkotne čěske město bliže wobhladać. Z luksusowym busom podachmy so potom dale do Prahi. Prjedy hač započachu so prěnje přednoški, kotrež dyrbjachmy našim sobušulerjam wo zajimawostkach města prezentować, móžachmy sej wšitcy něšto k wobjedu popřeć. Po přednoškach na Wjacławskim naměsće a před starej operu započinaše so hrimać a dešćować. Podachmy so do studentskeho internata a tam rozdźělichmy stwy. Ćmowe mróčele nad Prahu so zhubichu a z dobrej naladu a motiwaciju nawróćichmy so do centra. Tam pokročowachmy z wuskušowanjom “kralowskeho puća". Slědowachu přednoški wo časniku Orloju, Karlowym mosće, Narodnym dźiwadle a hrodźe. Puć na Hradčany běše tróšku napinacy, ale wulkotneho wuhlada dla so próca wudani. Wječor dachmy sej tradicionalnu čěsku jědź, potajkim smaženy sýr z bramborem a tatarskej omačku zesłodźeć. Wučerpani nawróćichmy so do internata. Z tym běše prěni wulkotny dźeń w Praze zakónčeny.

Na přichodnym ranju zetkachmy so we wosmich, zo bychmy so znowa do centra k snědani pola podali. Slědujo na to jědźechmy z powjaznicu na horu Petřín – někotři samo běžachu. Na horje budźachmy so potom po špihelowym labyrinće. Štóž chcyše, smědźeše na Petřínsku Eiffelowu wěžu zalězć. Z 51 metrow wysokosće strowjachmy kiwajo našu wučerku paní Štillerovu. Na dompuću mějachmy hišće móžnosć k nakupowanju w Praze a w Liberecach. Napoł pjećich wotjědźe naš ćah zaso wróćo do domizny.

Přez ekskursiju skićeše so nam móžnosć, tute wulkotne město lěpje zeznać a mjez druhim rjanu sadu nawuknyć: „Ukončete prosím výstup a nástup, dveře se zavírají!“

9. lětnik Serbskeho gymnazija, Milena Šołćic, Xenia Koberec, Jana Młodźinkec, Aya Hrjehorjec, Sonja Markec, Lea Zopic