Pjatk, dnja 16.5.2025, přihotowachu so spěwarki a spěwarjo w Serbskim domje intensiwnje na dwaj koncertaj. Při tym pokazaše jim Michał Cyž z pomocu digitalneje techniki, što hižo derje zamóža a što hodźi so hišće polěpšić.
Sobotu, 17. meje, spěwaše chór w Malešanskej cyrkwi składnostnje wulkeho jubileja: Wjeska swjeći lětsa 800. róčnicu swojeho załoženja.
Njedźelu, 18. meje, wotmě so koncert w Husce składnostnje 79. serbskeho ewangelskeho cyrkwinskeho dnja. Wobaj koncertaj dirigowaše knjeni Kubicec, spěw muskeho chóra kjez Kowar. Koncertaj wobohaćichu instrumantalisća Serbskeho gymnazija: Korla Baier, 12. lětnik, hraješe pišćele, Leandra Nowakec, 9. lětnik, serbske huslički a Elnette Hentsch, 8. lětnik, hraješe na dudach. Přez koncert wjedźeštaj z informatiwnymi připowědźemi Elena Wawrikec a Julius Paška, wobaj z 11. lětnika.
Wšěm sobuskutkowacym: solistkam a solistam, cyłemu chórej kaž tež našej pianistce, Gina Hentschowej, wutrobny dźak za swój angažement. Wosebity dźak słuša našej dirigentce, knjeni Kubicec, za wšu prócu w předpolu a za cyłkowny wuměłski nawod tuteju wjerškow.
