Wot 3. do 4. meje 2025 přeměni so hotel Olšanka we wutrobje Prahi na jewišćo mjezynarodneho rejwanskeho wuměłstwa: Renoměrowane wubědźowanje AVE Bohemia přiwabi 462 wobdźělnikow z Čěskeje, Němskeje, Awstriskeje a Šwicarskeje do čěskeje stolicy. Mjez nimi: naša rejwanska skupina w kategoriji „Ludowa reja“, „Srjedźna starobna skupina“. Nawróćichmy so z wuběrnym druhim městnom domoj.
Hižo pjatk připołdnju poda so naša skupina połnje wočakowanjow do Prahi. Zaměstnjeni běchmy w studentskim internaće Hostivař, hdźež běchmy w dwójnych stwach zaměstnjeni. Popołdnjo wužiwachmy, zo bychmy z metro do centruma jěli a jón wuskušowali – a to cyle aktiwnje: Na Wjacławskim naměsće, na Staroměšćanskim kole a při Karlowym naměsće rejowachmy spontanje po dróze a nježnějachmy z tym jenož přiklesk, ale samo pjenjezy za našu skupinu. Dźeń dachmy při zhromadnej wječeri z tradicionalnymi čěskimi jědźemi a z wuchodźowanjom po wječornej Praze wuklinčeć.
Sobotu startowaše wubědźowanje we 8 hodź. a traješe hač do pózdnjeho wječora. Třo čłonojo jury hódnoćachu wustupy najwšelakorišich skupin z wjacorych krajow, kotrež nastupichu w pisanej wšelakorosći žanrow: wot klasiskeho baleta přez modernu reju hač k folklorje. Naša skupina prezentowaše z wysokej koncentraciju a z přećelnym wuprudźenjom dwě folklornej reji: Prěnju reju, „Reju radosće“, pokazachmy w rejwanskej drasće ewangelskich Serbow wokoło Budyšina, a druhu, „Symješka“ (z oratorija „Hrodźišćo“), rejowachmy w modernych čorno-čerwjenych drastach. Našej reji, kotrejž staj choreograf Kornela Kolembusa a swoja mandźelska, rejwanska wučerka Yuliya Kosyakowa, z nami nastudowałoj, a přeswědčištej publikum kaž tež kritisku jury. Wutrobny dźak jimaj za perfektny přihot kaž tež za motiwaciju!
Njedźelu wotmě so wulka swjedźenska gala. Po generalce w 13:30 hodź. zahaji so w 14:30 hodź. swjatočny gala-program najlěpšich skupin, po tym přepodachu so myta we wšelakorych kategorijach. Naša próca bě so wupłaćiła: Wuznamjenichmy so z wuběrnym druhim městnom w našej kategoriji! Kóždy wobdźělnik dósta před połnje wobsadźenej žurlu diplom a medalju. Přepodachu nam tež krasny škleńčany pokal.
Z wjele nowymi zaćišćemi, zhromadnymi dožiwjenjemi a ze skrućenym skupinskim začućom nastupichmy domjězbu. W busu so wjele spěwaše a směješe, doniž njedźelu wječor wokoło 20 hodź. zaso w Budyšinje přijědźechmy – wučerpani, ale přewšo zbožowni.
Mjezynarodne wubědźowanje AVE Bohemija 2025 njebě za nas jenož rejwanski wjeršk, ale tež njezapomnite dožiwjenje połne kultury a emocijow w zhromadnej towaršliwej atmosferje.
J.Štillerová a S. Rječcyna w mjenje rejwanskeje skupiny brigady
