Časowy swědk knjez Jakub Wjacławk powěda šulerja wo swojim studiju w Čěskej
Dnja 11. decembra 2023 wotmě so jimaca rozmołwa z časowym swědkom, kotraž přewjedźe so we wobłuku projekta k wudźěłanju wučbneje šćežki k serbskim slědam we Warnoćicach po Druhej swětowej wójnje. Šulerki a šulerjo kursa čěšćiny 11 wučerki Jany Štilleroveje mějachu jónkrótnu składnosć knjeza Jakuba Wjacławka, 1934 rodźeneho časoweho swědka, do Serbskeho gymnazija přeprosyć. Knjez Wjacławk słušeše k młodym Serbam, kotřiž wopytachu po Druhej swětowej wójnje serbski gymnazij w sewjernych Čechach. Za čas hodźinskeje rozmołwy rozłoži wón wosobinske nazhonjenja a dožiwjenja swojeho šulskeho časa w Čěskej Lípje a Warnoćicach. Šulerjo mějachu wězo tež składnosć prašenja stajeć a tak wjele wo tehdyšim powójnskim času wuknyć. Nimo dohladow do žiwjenja serbskich młodostnych po Druhej swětowej wójnje, kotryž bě wot chudoby a zdobom noweho spočatka a dyrdomdejow charakterizowany, bě to lochkosć a samozrozumliwosć, z kotrejž knjez Wjacławk čěsku rěč wužiwaše.
Cyłkowny projekt přewjedźe so wot Serbskeho instituta pod nawodom dr. Jany Piňosovej a dr. Roberta Lorenca a spěchuje so wot Załožby za serbski lud. We wuskej kooperaciji z partnerami z Čěskeje a Němskeje so projekt wot šulerjow a šulerkow z Łužicy a Warnoćic aktiwnje sobu wuhotuje. Zaměr projekta wobsteji w tym, zhromadnje wučbnu šćežku po Warnoćicach nadźěłać. Młodostni budu lěto intensiwnje na wučbnej šćežce sobu dźěłać, zo bychu zajimcam serbske slědy we Warnoćicach po Druhej swětowej wójnje zbližili.
Zarjadowanje z knjezom Wjacławkom bě dźěl rjada zetkanjow, dźěłarničkow a ekskursijow, kotrež tworja žro hranicy překročaceho projekta. Wotewrjenje wučbneje šćežki je za nazymu 2024 planowane a ma wuznamny přinošk k zachowanju serbskeho kulturneho herbstwa we Warnoćicach tworić.
Jana Piňosová, Serbski institut
Jana Štillerová
