Šulerjo dźěłaja na logu za projekt “Wučbna šćežka k serbskim slědam we Warnoćicach“
Dnja 13.11.2023 a spočatk februara 2024 dźěłachu naše šulerki a naši šulerjo čěšćiny 11. lětnika na logu projekta za zhotowjenje wučbneje šćežki k serbskim slědam we Warnoćicach po Druhej swětowej wójnje. Pod nawodom našeho wučerja za wuměłstwo knjeza Hagena Kambacha a Budyskeje wuměłče knjeni Claudije Matoušek su najprjedy zhonili, što logo docyła je a kak měło tajke wupadać:
- Dobre logo měło jednore dosć być, zo by z ruku rysowany było a přiwšěm kaž original wupadało. Wone njeměło žane woznamy abo asociacije wubudźić. Wšitko dyrbi zrozumliwe być.
- logo měło trajny zaćišć zawostajić
- dyrbi lochce spóznajomne a njezaměnliwe być
- logo měło cilowu skupinu narěčeć
- słuži jako znamjo a je reprezentant projekta
- dobre logo je stajnje funkcionalne
- dobre logo přiměri so duchej časa
- logo dyrbiš so lochce spomjatkować móc
- logo dyrbi samostatne być
- logo dyrbi reprodukujomny być
Z pomocu tutych informacijow rysowachu młodźi wuměłcy wšelake motiwy a wužiwachu słowjanske barby a ornamenty, doniž njejsu wjacore zajimawe loga nastali. Tute prezentuja woni na přichodnej dźěłarničce čěskim partneram, zo bychu potom zhromadnje reprezentatiwne logo wupytali. Dokelž pochadźa knjeni Matoušekowa z němsko-čěskeje swójby, rěči nimo němčiny tež čěsce, tak zo mějachu młodostni móžnosć, dalšu maćernorěčnu rěčnicu słyšeć a swoje znajomosće čěšćiny nałožować a pohłubšić.
Přichodne zetkanje wotměje so 21.3.2024 we Warnoćicach, hdźež wuhotuje naš gymnazij koncert a předstaji so tež nowu rejwansku skupinu kaž tež dudakaj. Planowanej stej w tutym šulskim lěće hišće znajmjeńša dwě dalšej zetkani, na kotrymajž budu šulerjo wobeju gymnazijow hromadźe na projekće dźěłać. Wjeselimy so hižo nětko na wuspěšne zhromadne dźěło!
PhDr. Jana Štillerová