Wot 4. do 7. nowembra 2025 wotmě so we Werdauwje lětuši Centralny rěčny seminar. Rěčnje wobdarjene šulerki a šulerjo z cyłeje Sakskeje so tam zetkachu, zo bychu swoje znajomosće w pjeć rěčach pohłubšili: w čěšćinje, rušćinje, španišćinje, francošćinje a łaćonšćinje.
Puć hač do Werdauwa běše naročny: Najprjedy so wot wučerjow na šulach najlěpše šulerki a šulerjo za Regionalny rěčny seminar namjetuja. Jenož někotři z nich so wot LaSuB Budyšin wuzwola – zwjetša pjeć do šěsć hólcow abo holcow na rěč. Štóž so při regionalnym wubědźowanju wosebje kwalifikuje, smě so skónčnje na Centralnym rěčnym seminarje wobdźělić. Tu zetkaja so na rěč něhdźe sydom do wosom wuknjacych z cyłeje Sakskeje.
Tema lětušeho seminara rěkaše „Zapping through the TV“ – napjaty ramik, kotryž kreatiwne přinoški we wšelakich rěčach garantowaše. Kóžda skupina nadźěła dwě do tři so k temje hodźace krótke prezentacije kołowokoło telewizije.
Skupina francošćiny pokaza wjedrowu předpowědź, wuknjensku dokumentaciju a Bollywood-přinošk.
W španišćinje bu zahorjaca telenovela inscenowana.
Skupina łaćonšćinarjow překwapi z powěsćemi, sportowym wusyłanjom a „Bojom gladiatorow“.
Čěšćinarjo prezentowachu show Star Dance kaž tež Pěskowčika z knoćikom. Jako wabjenje prezentowachu woblubowany šokolodźany poprjanc Fidorka.
Skupina rušćiny pokaza dźěćace wusyłanje a napjatu kuzłarsku show.
Z našeje šule wobdźělichu so Annelie, Rosalie a Józef (čěšćina), kaž tež Gabriel w rušćinje. Wšitcy rozprawjachu zahoriće wo štyrjoch intensiwnych seminarnych dnjach połnych wjesela, dźěła w teamje a rěčnych wotkryćow. Nimo rěčneje wuměny postarachu so zhromadne wólnočasne aktiwity wo wotměnu: W swobodnym času so sportowaše – při wolejbulu abo mocosporće (Kraftsport) w fitnesowym studiju.
Centralny rěčny seminar bě njezapomnite dožiwjenje, kotrež njeskrućeše jenož rěčne kmanosće, ale zmóžni tež nowe přećelstwa a interkulturelne zetkanja. Gratulujemy našim wobdźělnicam a wobdźělnikam wutrobnje k wulkotnemu wukonej!
