Wot 26. do 29. nowembra 2025 wotměwaše so Regionalny rěčny seminar we Wětrniku we Wodowych Hendrichecach. Idylisce ležacy kubłanski dom skićeše perfektnu atmosferu za štyri powučne a kreatiwne dny. 38 rěčnje wobdarjenych šulerkow a šulerjow z gymnazijow Budyskeho wokrjesa so tam zetka, zo bychu w šěsć rěčach na zhromadnej temje dźěłali: Z rěčemi přez medije.
Z našeho gymnazija běchu Mila Klimanec, Marta Malinkec a Sara Clausenec (8-1) w kursu čěšćiny, kaž tež Valentina Šołćic (8-2) w kursu francošćiny zastupjeni – wuzwoleni z najlěpšich šulerjow swojich fachowych směrow. Za kóždu rěč běchu jenož šěsć do sydom wobdźělnikow z cyłeho wokrjesa Budyšin přeprošeni, štož čini seminar k wosebitemu wuznamjenjenju za wuzwolenych.
Šulerki a šulerjo rozestajachu so w swojich skupinach intensiwnje z medijowym swětom a wuhotowachu po tym swójske dźiwadłowe hry, kotrež sobotu dopołdnja před něhdźe 80 zahoritymi hosćimi – zwjetša staršimi a přiwuznymi – předstajichu. Při tym pokazachu pisany spektrum kreatiwnych idejow:
- Pólšćina: Wuknjenske materialije na tableće – wuknjenje digitalnje
- Rušćina: Knjez Mróz z wot handyja wotwisnej dźowku
- Čěšćina: Popjelawka dźensa z live-hudźbu – Sara přewodźeše na klawěrje
- Španišćina: Rejwanske wubědźowanje a komunikacija přez moderne medije
- Francošćina: Kak so lubosć přez lětdźesatki wuznawaše – wot lista přez telefon hač k Whatsappce
- Łaćonšćina: Gladiatorojo tehdy a dźensa – bój přez lěttysacy
Nimo pilneho dźěła zwosta dosć chwile za zetkawanje a wjeselo: Měšćanska rallye, wopyt tamnišeho gymnazija a hodownych wikow, zhromadne rejwanje z kapału z Drježdźan kaž tež słódna jědź seminarske dny skulojćichu. Podpěrane buchu skupiny wot dźiwadłoweho pedagogu Měrka Brankačka z Budyšina, kotryž jim ze swojimi nazhonjenjemi a lóštnym humorom při wuwiwanju scenow poboku steješe.
Na kóncu předstajichu wšitke rěčne skupiny swoje dźiwadłowe sceny, kotrež ze swojim žortom, wšelakorosću rěčow a spontanosću publikum zahorichu. To wobdźělenym pokaza, zo su rěče daloko wjace hač gramatika a wuknjenje wokablow: Wone wotewrjeja kreatiwne móžnosće zwuraznjenja a ludźi zwjazuja.
Wulki dźak słuša Budyskej wotnožce Sakskeje kubłanskeje agentury, wosebje hłownej zamołwitej seminara knjeni Winsmannowej, kotraž je so z wulkim angažementom za to zasadźowała, zo móžeše so seminar scyła zaso wotměć.
Jana Štillerová
