Čěski tydźeń na Serbskim gymnaziju steješe cyle w znamjenju zetkawanja, rěče a žiweho serbsko-němsko-čěskeho přećelstwa. Cyły tydźeń dołho buchu z wučbnych dnjow wosebite dožiwjenske dny – w rjadowniskich rumnosćach, w swójbje a wosrjedź města.
Přichad a prěni šulski dźeń
Njedźelu wječor, 7. decembra, zaćahnyštej šulerce Warnočanskeho gymnazija Nela a Markéta do našeho internata a přewodźeštej cyły tydźeń wučbu w 10-2. W prěnjej hodźinje čěšćiny zeznaštej z pomocu wšelakich zeznawanskich hrow swojich nowych sobušulerjow a dóstaštej po tym wodźenje po šuli. Popołdnju wotkryštej sej město, zhoništej wjace wo stawiznach Budyšina a daštej dźeń na hodownych wikach z tradicionelnym dźěćacym punšom wuklinčeć.
Němsko-čěski projektny dźeń ze 6. lětnikom
Wjeršk tydźenja bě wutora, 9. decembra: 33 šulerkow a šulerjow 6. lětnika z Warnoćic, kotřiž mjeztym hižo tři měsacy němsce wuknu, wopytachu naš gymnazij a zetkachu so z 28 wuknjacymi čěšćiny našeho 6. lětnika. 10. lětnik bě hosćom šulsku rallye spřihotował, při kotrejž móžachu twarjenje a wažne městna wšědneho šulskeho dnja zeznać. Po tym Leńka (10-2) dźěćom pokaza, kak pasli so hodowna hwězda. Samo pasleny suweněr smědźachu sej wšitcy sobu domoj wzać.
Potom přińdźechu němscy a čěscy šulerjo při zeznawanskich hrach hromadźe: Woni zhonichu mjena druhich, rěčachu wo jich zajimach a hobbyjach a wuměnichu zakładne informacije – přeco cuzu rěč nałožujo. K zakónčenju zaspěwachu wšitcy zhromadnje čěsku wersiju spěwa „Jingle Bells“ a dachu sej wobjed w šulskej kantinje zesłodźeć. Popołdnju dźěše w małych skupinach na hodowne wiki, hdźež dožiwichu dźěći hodowne tradicije a lokalne chłóšćenki wuspytachu. Wokoło 16 hodź. nawróći so Warnočanska skupina połna zaćišćow zaso domoj. Prěnje přećelstwa běchu nawjazane, telefonowe čisła wuměnjene a předwjeselo na nalětni wopyt we Warnoćicach je hižo wulke.
Zetkanja w swójbje a wučbje
Srjedu, 10. decembra, steješe wosebite interkulturelne dožiwjenje na programje: Francoske a čěske šulerki pječechu a debjachu zhromadnje poprjancy w čěsko-serbskej swójbje. Tak bu žiwa wjacerěčnosć z tradicionelnej dohodownej aktiwitu zwjazana – wonjate, kreatiwne a wutrobite to dožiwjenje.
Štwórtk wopytaštej čěskej šulerce kurs čěšćiny w 11. lětniku. Tam přewzaštej zdźěla samo rolu wučerki: Pomhachu při nadawkach, podpěrachu swoje serbske abo němske sobušulerki a sobušulerjow a zeznajomichu dalšich čěskorěčnych młodostnych našeje šule. Popołdnju steješe wopyt w Budyskim Wopomnišću na programje, kotryž skićeše wšitkim wobdźělenym nowe dohlady do tehdyšich stawiznow.
Kabaret, identita a rozžohnowanje
Pjatk, 12. december, tworješe kulturne zakónčenje čěskeho tydźenja: Do awle našeho gymnazija přeprošowaše němsko-čěski kabaret „To téma ” – prěni a jenički swojeho razu ze sydłom w Praze. Ansambl wobsteji poprawom z pjeć wuměłcow. Na tutym dnju pak steještaj jenož Roman z Čěskeje a Filip ze Šwicarskeje na jewišću. Rěčitaj dwurěčnje ze simultanym přełožkom a zwjazujetaj humor z politiskimi a kulturnymi temami, tak zo je hra nimale přeco interaktiwna. Pokazałoj staj najznaćiši kruch ansambla „Začuće a cit“, w kotrymž dźe wo pozdatnje jednore, poprawom pak jara zakładne prašenja: identita, mjenjehódnosć a hódnota, čěska zalubowanosć, kulturna błudnosć identity, hněwanje přez rěč(e), bledźenje a rěčne knedle.
Popołdnju nastupichu čěske šulerki domojjězbu. Woni zawostajichu dźakne listy za rjadownje, kotrež běchu w tutym tydźenju wopytali a wuzběhnychu, kak derje je so jim přebytk lubił a zo chcedźa jara rady zaso přińć. Čěski tydźeń njeje tuž jenož rěčne wuknjenske postupy zmóžnił, ale předewšěm wosobinske zetkanja, dowěru a wćipnotu na so wubudźił – štož je sylna baza za dalše serbsko-němsko-čěske zhromadne dźěło našeho gymnazija.
Jana Štillerová
