Hodowne debjenki ze stawiznami – Wopyt z Prahi w kursu čěšćiny
Wutoru, 16. decembra 2025, dósta kurs čěšćiny 11. lětnika wosebity wopyt: Čłonce Towarstwa přećelow Serbow, Eliška a Vlaďka, předstajištej šulerkam a šulerjam krasnu hodownu rjemjeslnisku tradiciju z Kyrkonošow. Zhromadnje z hosćomaj smědźachu młodostni sami kreatiwni być a filigranu hodownu pychu ze škleńčanych parličkow paslić.
Tute wuměłstwo pyšnych škleńčanych parličkow a parličkow za hodowny štom ma dołhu tradiciju: Hižo we 1870tych lětach wuwi so w Poniklovje, małej wjesce w Kyrkonošach, centrum tutoho njewšědneho rjemjesła. 1902 zadomi so tam Stanislav Horna ze swojej swójbu a załoži prěnju parlowu manufakturu. Po Prěnjej swětowej wójnje běchu drobne, z ruku dute ornamenty jara woblubowane a wuwožowachu so do wšeho swěta – přez wikowanske firmy w Jablonecu nad Nisou, kotrež płaćeše tehdy jako centrum debjenkoweho eksporta.
Wuměłstwo duća parličkow a pyšenja je so w Poniklá hač do dźensnišeho zdźeržało – jako poslednje městno po cyłym swěće, hdźež so tuta tradicionalna technika hišće praktikuje. Tuta so wot generacije ke generaciji dale dawa a wobstajnje dale wuwiwa. Za tutu njewšědnu tradiciju bu zhotowjenje škleńčanych parličkow a parličkow za hodownu pychu w lěće 2020 do UNESCO-lisćiny imaterielneho kulturneho herbstwa přiwzate.
Za čas dźěłarnički zhonichu šulerki a šulerjo, kotre rjemjeslniske kročele za błyšćacymi debjenkami tča – wot duća, poslěbornjenja a barbjenja škleńčanych parličkow hač k wuměłskemu plećenju a tworjenju ornamentow. Wosebje jimace bě, kak preciznje a sćerpliwje dyrbiš při tym dźěłać.
Hodźina čěšćiny njeskićeše jenož kreatiwnu wotměnu k wšědnemu šulskemu dnjej, ale tež žiwy dohlad do čěskeje kultury, kotraž je dźensa po cyłym swěće jónkrótna. Na kóncu projekta dźeržachu wšitcy wobdźělnicy samo zhotowjene ornamenty w rukomaj – błyšćacu dopomnjenku na zetkanje, kreatiwitu a žiwu tradiciju.
,Diese Maßnahme wird mitfinanziert durch Steuermittel auf der Grundlage des vom
Sächsischen Landtag beschlossenen Haushalts.
Jana Štillerová
