24. měrca 2026 přewjedźechu naši čěšćinarjo 6. lětnikow napjaty napřećiwny wopyt na našej partnerskej šuli, gymnaziju we Warnoćicach. Po tym zo běchu nas čěscy šulerjo hižo w decembru w Budyšinje wopytali, wjeselachmy so nětko jara na zasowidźenje. Přijězd wotmě so z ćahom. Wulězli smy při Starym dwórnišću we Warnoćicach – historisce wuznamnemu městnu, přetož mjez 1946 a 1949 přichadźachu tu tež serbscy šulerjo, kotřiž tehdy we Warnoćicach do šule chodźachu. W bjezposrědnjej bliskosći informowachu so naši šesćo skrótka wo wučbnej šćežce „Serbja we Warnoćicach“, na kotrejež nastaću bě naš gymnazij zhromadnje ze Serbskim institutom wobdźěleny. Někotre stacije tuteje wučbneje šćežki móžachmy sej na městnje wobhladać a tak stawizny direktnje dožiwić. Dźěše pěši dale na gymnazij. Tam započa so zhromadny dźeń ze sportowymi aktiwitami pod hołym njebjom: Při kopańcy a druhich hrach z bulom móžachu so serbscy / němscy a čěscy šulerjo njenućeni zetkać. Po tym buchmy w sportowej hali oficialnje witani a so na wšelakich zeznajomnskich hrach lěpje zeznajomichmy. Na to wodźachu nas čěscy přećeljo w małych skupinach po swojej šuli a podachu zajimawe dohlady do swojeho wšědneho šulskeho dnja. Wosebity highlight bě zhromadny wobjed w šulskej kantinje: Sydaše hrochowa poliwka, rězk z běrnami, krušwa, solotej z čerwjeneje rěpy a wodu, kotruž sy sej lubowólnje nachwatać móhł. Jědź bu wot wšitkich jako jara słódna začuwana a skićeše zdobom mały dohlad do čěskeje jědźneje kultury. Popołdnju wuslědźichu naši šulerjo w małych skupinach we wobłuku měšćanskeje rallye Varnsdorf. Při tym njezeznachu jenož wažne městnosće města, ale mějachu tež składnosć, samostatnje małe nakupy wobstarać. Po podawkow połnym dnju nastupichmy skónčnje wróćojězbu do Budyšina. Domojjězba wotběža bjez problemow, a wšitcy wróćichu so z mnohimi nowymi zaćišćemi a pozitiwnymi dožiwjenjemi domoj. Wuměna z našej partnerskej šulu je jónu bóle pokazała, kak drohotne tajke zetkanja za mjezsobne zrozumjenje a zhromadne wuknjenje su.
Někotre impresije: "Jědź bě jara słódna, wjele lěpša hač pola nas. To móhła sej naša šula wothladać." "Je mje překwapiło, zo maja Varnsdorfčenjo klubownju z playstation a X-box." "Šula je jara stara, ale nuzniki běchu rjenje čiste." "Měšćanska ralley bě napinaca. Sym skerje swoju jendźelšćinu polěpšił." "Mějach to za woprawdźe wulkotne, zo běchu wšitcy tak přećelni a zo smy nowych přećelow namakali." "Maja wjele awtomatow z napojemi a přikuskami."
PhDr. Jana Štillerová
