Znajeće SAL, Societas amicuum Liberec? 2016 załožene, nadměru na spěchowanje kultury mjez Čěskej, Pólskej a serbskej Łužicu aktiwne towarstwo?
Na přeprošenje SAL pobyštej dorostowy chór a rejwanska SGB składnostnje 10. załoženskeje róčnicy SAL wot 17. hač do 19.04.2026 w Liberecach. Hnydom po přijězdźe započachu šulerjo pjatk dopołdnja pilnje zwučować: Chór přihotowa zhromadnje z J. Škodźineje a M. Kowarjom dwaj koncertaj. Rejwarki dźěłachu pod nawodom K. Kolembusa dale na rejach za nowy oratorij “Wulkotna woda”, kotryž změje 11. septembra 2026 w Budyšinje premjeru a so kónc septembra w Liberecach dalši króć předstaji. Za to mějachu rejwarki wulkotne wuměnjenja: perfektnu baletnu žurlu z wulkimi špihelemi.
Sobota bě za wšěch wužadaca: Nóžkowachmy poł hodźiny wot hostela do centruma, do Krajneje wědomostneje knihownje, hdźež přihotowachmy so na wobšěrny swjedźenski program SAL. Popołdnju dožiwi publikum wotměnjawe přinoški: Naš chór bě z rejwanskej skupinu sep woblubowanych serbskich a mjezynarodnych spěwow a rejow spřihotował. Tež přinoški dźěćaceje rejwanskeje skupiny z Čěskeje kaž tež krótke wideja wo 10-lětneje dźěławosći SAL skulojćichu swjedźenske popołdnjo. Pjatk a sobotu wječor wužiwachu naši šulerjo k zhromadnej zabawje a za krótke wuchodźowanje.
Njedźela započa so za wšěch měrniša: Chór pućowaše do města, hdźež wopyta “Sewjeročěski muzej. Popołdnju pak slědowaše hižo proba za dalši chórowy koncert, tutón raz w cyrkwi Swjateho Bonifatiusa. Rejwanska skupina wužiwa dopołdniši čas k skrućenju nowych rejow. Po wobjedźe běchu chětro sprócni, tak sej popřejachu, tež sylnych zliwkow dla, dołhu přestawku, doniž njezarumowachu bus ze wšěmi wačokami a wotewzachu chór při cyrkwi. Wučerpani, ale wjeseli, podachu so wšitcy zhromadnje na dompuć.
Tute tři dny běchu za wšitkich wobdźělenych wužadace, ale jara rjane zhromadne dožiwjenje.
Dźakujemy so w prěnim rjedźe knj. Janje Vančatovej a wšěm dalšim pomocnikam SAL, kiž su wuprawu za nas tak perfektnje organizowali: financielnje, logistisce, kulinarisce – a to wšo z wulkej wutrobitosću. Dźak tež Domowinje, C. Škodźe, za financowanje busa, Załožbje za Serbski lud za financowanje honorarow knjeza Kolembusa kaž tež firmje Schmidt-Schwarz za spušćomny busowy transfer.
A kotre bě nětko za dźěći narjeńše dožiwjenje jězby? “Baletna žurla!”, “Słódna jědź!”, “Zhromadna bjesada wječor na našich stwach!”, “Hospodliwosć a rjane dariki!”, “Ach, bě přewjele rjaneho, hinak njemóžeš to scyła rjec!”.
Tomu so rady přizamknu J. Škodźina, S. Rječcyna a M. Kowar.
