Wot 17. do 18. septembra 2026 wotmě so w klóštrje Marijinym Dole we Wostrowcu 9. sakska bohemiada – sakska olympiada w předmjeće čěšćina. Zarjadowanje so w dwulětnym rytmusu wot LaSuB Zwickau pod nawodom knjeni Klieroweje organizuje a přez fachoweho poradźowarja za čěšćinu podpěruje.
Dohromady wobdźěli so 28 šulerkow a šulerjow w štyrjoch kategorijach wubědźowanja. Zastupjene běchu gymnazije z Drježdźan, Pirny, Sebnicy, Dippoldiswaldy, Wodowych Hendrichec, Žitawy, Lubija a Ochranowa kaž tež naš Serbski gymnazij. Wosebje zwjeselacy bě wuspěch našeje šulerki Celine Häntzschel z rjadownje 9-2, kotraž doby w kategoriji A1+ druhe myto, a Rosalie Baier, rjadownja 10-3, kiž w najwyšej kategoriji bohemiady, A2+, třeće myto doby. Gratulujemy woběmaj wutrobnje k tutomu wuběrnemu wukonej!
Po přijězdźe prěnjeho dopołdnja su wobdźělenych knjeni Klieroweje a noweho fachoweho poradźowarja za čěšćinu, knjeza Toma Hausmanna z gymnazija Drježdźany-Tolkewitz, witali. Po zhromadnym wobjedźe započa so fachowy dźěl wubědźowanja z nadawkom za słuchanje.
Popołdnju dźěłachu němske a čěske šulerki a šulerjo w měšanych skupinach hromadźe. W běhu třoch hodźin wuwiwachu a produkowachu krótke wideja k podatym temam. K tomu słušachu na přikład wabjenske wideja, přinoški wo swójskej šuli abo kreatiwne prezentacije ze šulskeho wšědneho dnja. Młodostni z Turnova podpěrachu němskich wobdźělenych při formulowanju, při wurjekowanju a při wuhotowanju widejow. Tak njebu čěšćina jenož pruwowana, ale bjezposrědnje jako komunikaciski srědk dožiwjena.
Prěni wubědźowanski dźeń wuklinča po wječeri w zhromadnej, wólnej atmosferje. Šulerki a šulerjo móžachu mjez karaoke z disko a lěhwowym wohenjom wolić. Wobaj poskitkaj skićeštej składnosć, nowe styki nawjazać a zetkanje nimo wubědźowanja dale wjesć.
Druhi dźeń stejachu dialogi z čěskimi šulerkami a šulerjemi wyšeje šule Turnov w srjedźišću. W partnerskich rozmołwach su wšědnemu dnjej bliske temy wobjednali, mjez nimi jězby, nakupowanje, jědź, Praha a wólny čas. Dialogi žadachu sej rěčnu wěstotu, spontane reagowanje a kmanosć, so w realnej rozmołwnej situaciji zrozumliwje zwuraznić.
Runje tutón dźěl bohemiady pokaza wosebitu hódnotu zarjadowanja: Šulerki a šulerjo móžachu swoje rěčne znajomosće nic jenož pod wuměnjenjemi pruwowanja, ale w direktnej wuměnje z jenak starymi čěskimi partnerkami a partnerami nałožować. Zetkanje činješe widźomne, kak rěč dorozumjenje, zhromadne dźěło a přećelstwo zmóžnja.
Po wuhódnoćenju wubědźowanskich wukonow wotmě so swjatočne spožčenje myta. Myta přepodachu so přez sakskeho kultusoweho ministra Conrada Clemensa a generalnu konsulku Čěskeje republiki, knjeni Valhová. Jich wobdźělenje podšmórny wuznam čěskeje rěče a mjezy překročaceho zhromadneho dźěła mjez Sakskej a Čěskej.
9. sakska bohemiada bě wšitkim wobdźělenym intensiwna měšeńca wubědźowanja, kreatiwneho dźěła, rěčneje praksy a interkulturneho zetkawanja. Dźakujemy so organizatorkam a organizatoram, wosebje pola knjeni Klieroweje, knjeza Hausmanna kaž tež wobdźělenych wučerjow a šulerkow a šulerjow z Turnova, za poradźene zarjadowanje.
Wutrobnu gratulaciju hišće raz Celine Häntzschel a Rosalie Baier!
