Srjedu, 16. septembra 2026, dojědźe sej 27 šulerkow a šulerjow 7. lětnika na wulět do zwěrjenca w Liberecu. Wopyt hodźeše so wuběrnje k aktualnym wobsaham wučby a skićeše móžnosć, zwěrjata, jich žiwjenske rumy a nadawki moderneho zwěrjenca bjezposrědnje zeznać.
Najebać najprjedy skerje njepřihódnu wjedrowu prognozu, mějachmy wulke zbožo: Hač do něhdźe 15 hodź. swěćeše słónco, tak zo móžachmy zwěrjenc při přijomnym wjedrje wuskušować.
Při- a wróćojězba wopokaza so pak jako woprawdźite wužadanje. Padustwa kabla na železniskej čarje mjez Žitawu a Habrachćicami dla dyrbjachu narunanski wobchad kolijow zasadźić. Přez to podlěši so prěnjotnje planowany jězbny čas wot něhdźe dweju hodźinow na tři hodźiny.
Tež w Liberecu dyrbjachmy so dalšeho narunanskeho wobchada dla tramwajki wzdać a přidatny čas za dalejězbu k zwěrjencej zaplanować. Wróćojězba wotběža podobnje: Zaso dyrbjachmy so na narunanske busy wuwinyć, tak zo skónčnje něhdźe połdra hodźiny pozdźišo hač planowane do Biskopic dojědźechmy. Najebać mnoho přestupow čakanskeho časa a dołhu jězbu dopokazachu wšitke šulerki a wšitcy šulerjo sćerpnosć, wutrajnosć a dobru naladu.
W zwěrjencu Liberec móžachmy mnohe zwěrjata wobkedźbować. Wosebje jimace běchu cebry, kamele, wopicy, sowy, flamingi, nopawy, lawy a leopardy. Jedyn wjeršk bě wězo sławny běły tiger, kotryž słuša k wosebitym atrakcijam zwěrjenca Liberec.
Někotre zwěrjata bohužel widźeć njemóžachmy. Wobłuk elefantow bě prózdny, dokelž běchu poslednju elefantku zwěrjenca Liberec krótko do toho do noweho doma dowjezli. Z jeje přećahom skónči so po wjace hač 70 lětach dźerženje elefantow w zwěrjencu. Tež girafy njeběchu widźeć, dokelž jich pawiljon tuchwilu renowěruja.
Wosebje zamyslenych sčini nas prózdna mórska laguna. Kónc awgusta bě 17-lětny mórski law Hugo zemrěł, po tym zo bě dźěl klanki z hrajkami spóžrěł, kotraž bě do jeho basenka padnyła. Při obdukciji su klankowu hłowu w požiwanskim trakće zwěrjeća namakali. Tuta zrudna stawizna pokaza nam jara jasnje, čehodla njesmědźa so zwěrjata picować a čehodla njesmědźa so nihdy předmjety do hajnišća abo wody mjetać.
Po wopyće zwěrjenca zwosta hišće chwile za wuchodźowanje a wólny čas w centrumje Libereca. Šulerki a šulerjo móžachu čěske speciality a małe kulinariske dopomnjenki kupić, město dožiwić a čěšćinu zwonka wučby nałožować. Při nakupowanju, prašenjach za płaćiznami, skazanjom abo krótkimi rozmołwami so wujewi, zo su rěčne znajomosće wšědny dźeń wosebje wužitne.
Wopyt zwěrjenca bě z tym wjace hač wučbny wulět. Rjadownja móžeše najstarši zwěrjenc Čěskeje wopytać, mnohe zwěrjata zbliska dožiwić, zamołwitosć napřećo zwěrjatam reflektować a zdobom praktiske nazhonjenja z čěskej rěču zběrać.
Najebać dołheje a napinaceje jězby bě to rjany, wotměnjawy a powučny dźeń, na kotryž budźe so 7. lětnik wěsće hišće dołho dopominać.
PhDr. Jana Štillerová
