W běhu jenož 8 měsacow bě sej 1. serbska kulturna brigada pod wuměłskim nawodom Judith Kubicoweje nastudowanje třećeho swětneho oratorija předewzała: „Wulkotna woda z wočow fotografa“. Tutón běchu 14. januara hłowni iniciatorojo-wuměłcy, Měrćin Weclich, Johannes Gerstengarbe, Maćij Bulank na zakładźe tekstow lyrikarki Róže Domašcyneje w awli SGB předstajili. Połnje elana podachu so šulerki a šulerjo pjatk, 16. januara, w chórowym lěhwje w Hejnicach do dźěła: aranžer twórby, Johannes Gerstengarbe, nastudowaše z chórom takt po takće. W sćěhowacych měsacach slědowachu wužadace chórowe proby w awli SGB. Paralelnje ke chórej nazwučowaše rejwanska skupina pod nawodom Kornela Kolembusa štyri reje, kotrež wudospołnichu oratorij a předstajachu fasety wody z rjanymi a kritiskimi choreografijemi.
Oratorij bě dožiwjenje za wuši a woči: Spěwarki a spěwarjo brigady z rejwanskej skupinu předstajichu nowu twórbu ze Serbskej komornej filharmoniju, z band “Johannes und die Gerstengarbe”, wudospołnjeny z wobrazami Maćija Bulanka, trójce. Prapremjera wotmě so pjatk, dnja 11. septembra 2026, dalše předstajenje njedźelu, 13. septembra 2026, na žurli Budyskeje měšćanskeje hale „Króna“. A w Liberecach, hdźež witaše Brigadu 27. septembra towarstwo SAL k swojej 10. załoženskej róčnicy na žurli Techniskeje uniwersity, wospjetowaše so oratorij třeći raz. Wutrobny dźak hłownej organizatorce SAL, Janje Vančatowej, za wutrobite pohosćenje w Liberecu, SLA za spušćomnu organizaciju a přećelne zhromadne dźěło přez cyły projektny čas, Załožbje za serbski lud za financowanje a tež staršim za wšu podpěru tutoho wulkeho projekta. Jón zmištrowachu wšitcy wobdźěleni w běhu poměrnje krótkeho časa, štož bě za wšěch wosebite wužadanje. Přejemy sej, zo wostanu melodije kaž tež choreografije rejwanskeje skupiny a wobrazy M. Bulanka w pomjatku.
W mjenje 1. serbskeje kulturneje brigady
Sylwija Rječcyna
