„Zapping through the TV“ na Centralnym rěčnym seminarje (3.11.- 6.11.2026)
Prjedy hač móžeš so na Centralnym rěčnym seminarje we Werdauje pola Šwikawy wobdźělić, dyrbiš najprjedy Regionalny rěčny seminar wopytać. Tam zetkaja so najlěpše šulerki a najlěpši šulerjo z wotpowědneho wokrjesa. Štóž tam přeswědči, smě sej po tym na Centralny rěčny seminar dojěć, na kotrymž so najlěpši šulerjo z cyłeje Sakskeje wobdźěla.
Lětsa wobdźělichu so na seminarje tři šulerki z našeje šule: Marta Malinkec a Mila Kliemanec za čěšćinu, Valentina Šołćic za francošćinu. Seminar steješe pod hesłom „Zapping through the TV“. Šulerki a šulerjo rozdźělichu so do wšelakich rěčnych skupin: francošćina, rušćina, čěšćina, łaćonšćina a španišćina. Tam mějachu sej zhromadnje swójski program k temje přemyslić a jón na poslednim dnju tamnym skupinam prezentować.
W mojej skupinje francošćiny běchmy dohromady wosom šulerkow. Přińdźechmy mjez druhim z Lipska, Dippoldiswalde a Mišna. Prěni dźeń dźěše najprjedy raz wo to, so mjez sobu zeznać. To so chětro spěšnje zešlachći a mějachmy hižo wot wšeho spočatka wjele wjesela.
Wosebje derje lubiła je so mi dźiwadłowa dźěłarnička na prěnim wječoru. Tam smy nawuknyli, kak móžeš z rěču abo bjez słowow dźiwadźelić a wšelake sceny předstajić. Bě woprawdźe žortne, tež raz ze sebje won hić. Nimo toho mějachu wječor hišće mały program, kotryž běchu jednotliwe rěčne skupiny spřihotowali. Z kwisowymi prašenjemi, wšelakimi hrami, memoryjom a Activity-hru předstajichu wobdźělnicy swoje wotpowědne rěče na hrajne wašnje.
Druhi dźeń bě potom tak daloko: Započachmy z planowanjom swójskeho programa. Najprjedy dóstachmy wot našeho wučerja krótki zawod do francoskeje telewizije. Po tym smědźachmy sami rozsudźić, kotre sceny chcychmy k temje předstajić. Mějachmy chětro spěšnje někotre kreatiwne ideje: Jako prěnje chcychmy rubježnistwo w muzeju Louvre napodobnić a k tomu so hodźacu reportažu prezentować. Po tym planowachmy show talentow a jako poslednje skrótšenu a lóštnje předstajenu wersiju filma „Titanic“, při čimž mjez druhim kónc změnichmy: Pola nas mjenujcy Jack přežiwi a storči Rose prosće do wody. Po tym zo běchmy so na swoje ideje dojednali, dźěše na pisanje francoskich tekstow a zhotowjenje rekwizitow.
Na předposlednim dnju potom rěkaše: Teksty wuknyć a probować! Wšako čakaše na nas wulka prezentacija, na kotrejž wšitke rěčne skupiny swoje wuslědki předstajichu. Bě jara zajimawe widźeć, što běchu tamne skupiny přihotowali a kak rozdźělnje běchu temu zwoprawdźili. Tež naš francoski program přińdźe skónčnje na jewišćo a móžachmy pokazać, na čim běchmy poslednje dny dźěłali.
To najrjeńše na seminarje pak njebě jenož zhromadne dźěło, ale wulkotna atmosfera. Smy so wjele smjeli a kopicu nowych słowow a rěčnych wobrotow nawukli. Přez intensiwne zhromadne dźěło je wjele nowych přećelstwow a dopomnjenkow nastało, na kotrež tak spěšnje njezabudu.
Valentina Šołćic, 9-2
